Адбылася першая сесія раённага Савета дэпутатаў дваццаць восьмага склікання

Згодна з артыкулам 12 Закона Рэспублікі Беларусь “Аб мясцовым кіраванні і самакіраванні”, да выбрання старшыні Савета вёў яе старшыня тэрытарыяльнай выбарчай камісіі Аляксандр Грамыка. Перш-наперш ён агучыў канчатковыя вынікі выбараў дэпутатаў мясцовых Саветаў. На тэрыторыі раёна па 3-ох выбарчых акругах праходзілі яны ў абласны Савет, па 40 – у раённы, па 15 – у Мікашэвіцкі гарадскі і па 121 акрузе – у сельскія Саветы дэпутатаў. На 179 мандатаў прэтэндавала 189 кандыдатаў.
Аляксандр Грамыка падзякаваў жыхароў раёна за іх свядомасць і высокую выбарчую актыўнасць. На ўчасткі для галасавання прыйшлі 46 тысяч 275 чалавек з 55 тысяч 37-мі ўключаных у спісы для галасавання. Яўка выбаршчыкаў склала больш як 84 працэнты. Адначасова Аляксандр Мікалаевіч шчыра падзякаваў членаў участковых камісій за іх дакладныя і граматныя дзеянні ў ходзе важнай палітычнай кампаніі. На выбарчых участках ад грамадскіх аб’яднанняў, працоўных калектываў і грамадзян працавалі 345 назіральнікаў. Сур’ёзных заўваг ад іх не паступала.
Вынікі выбараў далі права сфарміраваць усе 13 паўнамоцных Саветаў дэпутатаў у поўным саставе. 19 лютага 2018 года адбылося пасяджэнне Лунінецкай раённай тэрытарыяльнай выбарчай камісіі па выбарах дэпутатаў раённага Савета дэпутатаў 28 склікання, на якім былі разгледжаны пратаколы участковых выбарчых камісій. У выніку зарэгістраваны 40 дэпутатаў Лунінецкага раённага Савета дэпутатаў дваццаць восьмага склікання.
У яго склад выбрана 7 жанчын (17,5 працэнта ад агульнай колькасці), 1 прадстаўнік Камуністычнай партыі Беларусі. 13 дэпутатаў (32,5 працэнта) прадстаўляюць прамысловасць, транспарт, бдаўніцтва; 15 дэпутатаў (37,5 працэнта) з’яўляюцца работнікамі дзяржаўных праваахоўных органаў і ваеннаслужачымі; 3 (7,5 працэнта) – працуюць у сельскай гаспадарцы; 2 (5 працэнтаў) – у адукацыі, культры, навуцы і ахове здароўя; 5 (12,5 працэнта) – прадстаўляюць іншыя сферы дзейнасці. У новым саставе раённага Савета дэпутатаў 26 чалавек (65 працэнтаў) з’яўляліся дэпутатамі папярэдняга склікання.
Аляксандр Грамыка павіншаваў дэпутатаў новага склікання з выбраннем і выказаў упэўненасць, што яны апраўдаюць высокі давер жыхароў Лунінеччыны і ўнясуць важкі ўклад у сацыяльна-эканамічнае развіццё нашага рэгіёна.
Неўзабаве, выканаўшы некаторыя пратакольныя патрабаванні, дэпутаты перайшлі да абмеркавання асноўнага пытання сесіі – выбрання старшыні раённага Савета дэпутатаў дваццаць восьмага склікання. Дэпутат ад Бастынскай выбарчай акругі №21 Фёдар Рашэцкі і Мікашэвіцкай-Гранітнай выбарчай акругі №36 Эдуард Гаўрылковіч прапанавалі на гэтую пасаду Віктара Рафаловіча. Іх падтрымаў старшыня райвыканкама Аляксандр Пачко, які браў удзел у рабоце сесіі. Аляксандр Мікалаевіч ахарактарызаваў Віктара Анатольевіча як мэтанакіраванага кіраўніка, добрага сем’яніна, сапраўднага грамадзяніна, які карыстаецца аўтарытэтам сярод дэпутатаў. “Віктар Рафаловіч узначальваў райсавет на працягу мінулага склікання, прадэманстраваўшы ўменне працаваць у камандзе. Плён сумеснай работы раённага Савета дэпутатаў і раённага выканаўчага камітэта за 2017 год – 6-ае месца Лунінеччыны ў абласной зводцы сацыяльна-эканамічнага развіцця раёнаў”, — канстатаваў Аляксандр Пачко.
У выніку 36 дэпутатаў з 38-мі, якія бралі ўдзел у галасаванні, падтрымалі кандыдатуру Віктара Рафаловіча на пасаду старшыні раённага Савета дэпутатаў, 1 – выказаўся супраць, 1 бюлетэнь падліковая камісія прызнала несапраўдным.
Прыняўшы віншаванні з выбраннем, В.А. Рафаловіч прыступіў да выканання непасрэдных абавязкаў – далейшага вядзення першай сесіі раённага Савета дэпутатаў дваццаць восьмага склікання. А разгледзець дэпутатам належыла 9 пытанняў, пераважная большасць якіх – арганізацыйныя. Так, намеснікам старшыні райсавета аднадушна быў выбраны дэпутат ад Лунінецкай-Захаодняй выбарчай акругі №6, намеснік старшыні райвыканкама Уладзімір Кавалевіч.
На сесіі былі створаны пяць пастаянных камісій. Пастаянную камісію па пытаннях законнасці і правапарадку, дэпутацкай этыцы ўзначаліў дэпутат ад Лунінецкай-Баханоўскай выбарчай акругі №19 Аляксандр Карлюк; па пытаннях эканомікі, бюджэту і падаткаабкладання – дэпутат ад Лунінецкай-Коласаўскай выбарчай акругі №12 Сяргей Карпец; па пытаннях мясцовага кіравання і самакіравання – дэпутат ад Гарадоцкай выбарчай акругі №29 Мікалай Арашкевіч; па аграрных пытаннях, экалогіі, рацыянальнаму выкарыстанню прыродных рэсурсаў – дэпутат ад Лунінецкай-Фабрычнай выбарчай акругі №10 Дзмітрый Коўшык; па пытаннях сацыяльна-культурнай сферы і сацыяльнай абароны насельніцтва – дэпутат ад Лунінецкай-Цэнтральнай выбарчай акругі №14 Таццяна Вайцяхоўская. Усе старшыні пастаянных камісій разам са старшынёй райсавета і яго намеснікам увайшлі ў склад прэзідыума Лунінецкага раённага Савета дэпутатаў.
Сесія зацвердзіла план работы раённага Савета дэпутатаў дваццаць восьмага склікання на 2018 год, унесла змяненні і дапаўненні ў рашэнне райсавета ад 27.12.2017 №200 “Аб раённым бюджэце на 2018 год” і некаторыя іншыя рашэнні. У прыватнасці, адменены пункт 8 рашэння райвыканкама ад 19.01.2015 г. №56 “Аб зацвярджэнні актаў ацэначнай камісіі і прадажы (перадачы) жылля”. Адначасова дэпутаты падтрымалі прапанаваны План арганізацыйных мерапрыемстваў па рэалізацыі палажэнняў Дырэктывы №2 “Аб дэбюракратызацыі дзяржаўнага апарата і павышэнні якасці забеспячэння жыццядзейнасці насельніцтва”. На пасяджэнні зацверджаны графік асабістых прыёмаў грамадзян дэпутатамі раённага Савета дэпутатаў дваццаць восьмага склікання.

Дадаць каментарый

Войти с помощью: 

Этот сайт использует Akismet для борьбы со спамом. Узнайте как обрабатываются ваши данные комментариев.